وٹس ایپ کے کروڑوں صارفین ہیں جن میں سے کئی نے حال ہی میں واٹس ایپ استعمال کرنا شروع کیا ہے۔ بہت سے پرانے استعمال کرنے والے بھی واٹس ایپ کو صرف پیغام بھیجنے اور وصول کرنے کے لیے استعمال کرتے ہیں اور اس ایپلی کیشن میں موجود کئی دیگر اہم سہولیات سے یا تو واقف نہیں ہوتے یا پھر ان میں دلچسپی نہیں رکھتے۔
ہم یہاں ایسے ہی کچھ صارفین کو مدنظر رکھتے ہیں چند آسان ٹپس بتا رہے ہیں
گروپ میں آپکا پیغام کس کس نے پڑھا ہے؟
گروپ میں بھیجے گئے اَپنے پیغام پر ٹیپ کرکے اسے سلیکٹ کرلیں۔ اِس کے بعد سب سے اُوپر دیئے گئے info کے آئیکن پر ٹیپ کریں۔ اگلے ہی لمحے آپ کے سامنے ان تمام لوگوں کی فہرست موجود ہوگی جنہوں نے آپ کا پیغام پڑھ لیا ہے اور ان لوگوں کی فہرست بھی جن تک آپ کا پیغام پہنچ چکا ہے لیکن ابھی انہوں نے اسے دیکھا نہیں۔
گروپ یا کسی مخصوص شخص کے پیغام پر منفرد ٹون بجانا
آپ کسی خاص شخص کی جانب سے یا کسی مخصوص گروپ میں آنے والے پیغام کی اطلاع حاصل کرنے کے لیے کوئی منفرد رِنگ ٹون لگا سکتے ہیں۔ اس طرح رنگ ٹون بجتے ہی آپ کو پتا چل جائے گا کہ کس کا پیغام آیا ہے یا کس گروپ میں آیا ہے۔
گروپ کے لیے رنگ ٹون متعین کرنے کے لیے گروپ کو کھولیں اور گروپ انفو میں جاکر کسٹم نوٹی فکیشن پر ٹیپ کریں۔ یہاں سے آپ اس گروپ کے لیے اپنی پسندیدہ رنگ ٹون منتخب کرسکتے ہیں۔
کسی فرد کا پیغام موصول ہونے پر الگ نوٹی فکیشن رنگ ٹون متعین کرنے کے لیے اس سے کی جانے والی چیٹ کھولیں اور اس فرد کے نام پر ٹیپ کریں۔ اس طرح اس فرد کی معلومات ظاہر ہوجائیں گی۔ یہیں پر آپ کو Custom Notification کا آپشن نظر آئے گا۔ اس پر ٹیپ کریں اور من پسند رنگ ٹون منتخب کرلیں۔ اگر آپ کی اس فرد سے پہلے کوئی بات چیت موجود نہیں تو آپ New Message کے آئی کن پر ٹیپ کرکے اس فرد کو منتخب کریں اور پھر چیٹ ونڈو میں سے اس کے نام پر ٹیپ کرکے کسٹم نوٹیفکیشن منتخب کرلیں۔
آپ کو کس نے بلاک کررکھا ہے؟
اَگر آپ کو لگ رہا ہے کہ آپ کے دوست نے آپ کو بلاک کر دیا ہے تو اُسکی پروفائل پکچر دیکھیں ۔ اگر وہ آپ کو دکھائی نے دے رہی تو اس بات کا غالب امکان ہے کہ اس نے آپ کو بلاک کررکھا ہے۔ اس کے علاوہ آپ اس شخص کو پیغام بھیج کر دیکھ سکتے ہیں۔ اگر میسج پر کافی وقت گزرنے کے بعد بھی ایک ہی Tick نظر آئے تو اس کا مطلب بھی یہی ہے کہ آپ کو بلاک کردیا گیا ہے۔
اہم پیغامات کو نشان زد کریں
آپ اہم پیغامات کو نشان زد کرسکتے ہیں تاکہ بعد میں ان پیغامات کو الگ سے پڑھ یا دیکھ سکیں۔ آپ اسے پیغامات کو بک مارک کرنا کہہ سکتے ہیں۔ جس پیغام کو نشان ذد کرنا ہو، اسے منتخب کریں یعنی اس پر انگلی سے کچھ دیر کے لیے ٹیپ کریں اور پھر اوپر ظاہر ہونے والے ستارے کے آئی کن پر ٹیپ کریں۔ اس طرح یہ پیغام نشان زد ہوجائے گا۔
تمام نشان زد پیغامات کو دیکھنے کے لیے مینیو کے تین عمودی نقطوں والے آئی کن پر کلک کریں (جس مینیو میں سیٹنگز کا آپشن موجود ہوتا ہے) اور Starred Messages پر ٹیپ کریں۔ تمام نشان زد پیغامات ظاہر ہوجائیں گے۔
واٹس ایپ کال میں ڈیٹا بچانا
اگر آپ واٹس ایپ کے ذریعے کالز کرتے ہیں اور چاہتے ہیں کہ زیادہ ڈیٹا بھی استعمال نہ ہوتو مینیو میں سے Settings پر ٹیپ کریں۔ اس کے بعد Data and Storage Usage پر ٹیپ کریں۔ یہاں سب سے نیچے Low data Usage کے چیک بکس پر ٹیپ کرکے اسے چیک کردیں۔
واٹس ایپ پر پیغام تلاش کرنا
اگر آپ کسی چیٹ میں کوئی مخصوص پیغام تلاش کررہے ہیں تو اس چیٹ کو کھولیں اور اس کے بعد اوپر موجود تین نقطوں پر ٹیپ کریں۔ یہاں آپ کو سرچ منتخب کرنا ہے۔ اَب جو بھی پیغام آپ کو تلاش کرنا ہے، اس کے چند الفاظ یا حروف لکھیں ، واٹس ایپ آپ کا مطلوبہ پیغام تلاش کرلائے گا۔
